政情：張文光谷新人 轉戰直選
一直雄霸立法會教育界議席嘅民主黨張文光，好耐之前已經講明會退位畀教協會長馮偉華接棒。點知佢未退位，九月又話要披甲上陣，轉戰直選，會去九龍西排名單第二位，力谷知名度較低嘅黃碧雲入局。白鴿黨要老將幫手谷票，黃碧雲嘅贏面有幾高，真係一清二楚。
大家都知，首次喺九龍西出戰立法會嘅黃碧雲，實在無乜人識，所以張文光排第二位，斷估有能力過幾千票畀黃碧雲。熟悉張文光嘅人都知，佢一直係功能組別嘅長勝將軍，今次難得下海接到直選洗禮，或會一嘗落敗滋味，都算係一次過滿足晒兩個願望喇。
至於其他選區，白鴿黨都無乜新氣息，新界東都係分拆兩條名單，由劉慧卿同黃成智各自帶領。港島區就由單仲偕代替甘乃威；九龍東則係胡志偉擔大旗，新界西部署反而最大膽，由主席何俊仁、李永達及陳樹英各領一條名單出戰。究竟咁多條隊會否受惠於鐵頭仁參選特首，過多幾個月就會知喇。