政情：休假仍受訪 邱騰華中伏
夕陽政府仲有兩個幾月就收檔，未知有無得留低嘅環境局局長邱騰華就繼續扮勤力，尋日休緊假都接受電台訪問，點知去到中伏，被人窒到口啞啞。話說主持問到，如果立法會唔支持興建焚化爐佢會否失望，佢就好坦率話：「當然會唔開心！」點知主持打蛇隨棍上，列舉佢四大劣迹，包括慳電膽、堆填區廢除特首令、兩電加價及面臨觸礁嘅焚化爐，叫佢揀邊樣最唔開心？
邱騰華話晒都做過新聞處，於是帶大家「遊花園」，話如果掉轉頭正面啲諗，當年大家都擔心膠袋徵費得唔得，但依家有九成市民支持，仲話啱啱諮詢完垃圾徵費，都估唔到有多於一半市民支持。佢話會努力游說議員，期望兩個月內獲得撥款興建焚化爐。
不過，邱騰華嘅如意算盤未必打得響，皆因泛民主派及建制派都表明現階段「支持唔住」，睇嚟興建焚化爐連通過下周五（二十日）立法會環境事務委員會「第一關」都勢危，難以令人想像未來兩個月去工務同財委會時有乜大轉向喇。