政情：李王配慈善高球賽奪獎
龍傳基金高爾夫球慈善賽尋日又開波，雖然今年球賽由深圳移師到東莞觀瀾湖舉行，但一眾政商界名人依然捧場，共一百位高球好手組成廿五支隊伍參賽，為善最樂。向來喺高球場最合拍嘅保安局局長李少光同滙豐銀行亞太區行政總裁王冬勝，今年繼續組隊參賽，最後王冬勝蟬聯「男子組個人一桿最近洞獎」，而佢同光哥嘅隊伍亦奪得隊際總桿獎季軍。
今次參賽嘅名人依舊有前高官馬時亨及金利來太子爺曾智明太太黎瑞恩，當然唔少得作為主人家嘅觀瀾湖高爾夫球賽會副主席朱鼎耀（Tenniel）啦！Tenniel嘅高球技術向來出眾，幾乎每次慈善賽都有獎落袋，今次佢個人又奪得三個獎項，包括男子組個人最遠距離獎、個人兩桿最近洞獎及個人總桿獎，而佢組成嘅隊伍更奪得隊際總桿獎冠軍添，高手兼主場果然不同凡響。