政情：陳岳鵬七一後冇着落
所謂一朝天子一朝臣，即使候任特首梁振英（CY）講過，上台後會優先沿用現任管治團隊，但作為最近身、朝見口晚見面嘅候任特首辦同七一履新後嘅特首辦，想用番自己人都係人之常情。本報尋日報道CY競選期間其中三名嘅「近身」，昨早已率先簽約喺候任辦返工。相反工作性質與三人類似嘅現任特首辦特別助理陳岳鵬（Ronald）就「斯人獨憔悴」，一般估計CY上台後佢就要離開特首辦。據聞前身為匯賢智庫嘅新民黨，亦好大機會唔會接收番Ronald。除非有新一屆政府嘅問責局長賞識佢主動接收，否則Ronald七一後隨時無處容身。
前匯賢智庫成員Ronald，一○年突然畀煲呔曾睇中後，立即辭去原有嘅南區區議員職務，丟低班選民過檔特首辦，結果匯賢嘅候選人喺佢騰空嘅議席補選輸得一敗塗地。據聞新民黨事後檢討覺得好傷，議席固然喪失咗，亦都令個黨多咗包袱，以後黨員一旦當選，一做就必須做足四年任期，「借殼上市」扶搖直上做官，已經成為該黨嘅禁忌，無形中令該黨後生一輩少咗條出路。
依家Ronald呢位「叛將」面臨失業，有新民黨中人預計即使Ronald有意回巢，相信黨主席葉劉淑儀亦好大機會唔會同意。加上CY已經搵咗三個「近身」洪綺敏、馮英倫同陳冉加入候任辦，如無意外七一後會順利過渡至特首辦，令Ronald繼續留喺特首辦嘅機會近乎零。
譚志源若延任或收留
有政界中人認為，其實本身喺外國著名學府畢業嘅Ronald，年輕又有朝氣，應該仲有大把世界，最腳踏實地嘅做法係疊埋心水，喺未來呢兩個半月爭取表現，希望得到其他問責官員賞識。有人估計最大機會接收Ronald嘅係政制及內地事務局局長譚志源，據聞兩人之前喺特首辦合作無間，加上譚志源亦有過官場失意、冇人肯收留嘅經歷，只要譚順利延任新政府，有機會引薦Ronald「轉會」政制局擔任政治助理，甚至更上層樓至副局長同佢拍住上喎。