中環出更：汽車世界特別號 時尚名人齊讚
本地有好多愛車之人，為咗照顧不同車迷嘅口味，《東方日報》早前強勢推出「汽車世界特別號（carworld Special）」，於每月嘅第二個星期五派發，當中嘅汽車資訊大幅強化，內容更見豐富，務求令到唔同階層嘅車迷都睇得津津有味。尋日推出第二期特別號，我哋特別請來兩位模特兒喺中環娛樂行派發，好多城中名人型男靚女索閱後都話好吸引，仲同卓妮分享佢哋多姿多采嘅駕駛體驗添！
旭日國際集團執行董事蔡加讚（Karson）年紀輕輕，已經有十年駕駛經驗，佢話好細個已對汽車有濃厚興趣，十六歲就喺美國考獲駕駛執照。身為汽車發燒友嘅Karson，對汽車刊物都好有要求，佢話除咗圖片要精美外，內容都好重要，尤其係汽車嘅測試報告，汽車性能同體驗佢都好感興趣。此外，車廠嘅歷史故事與發展策略，都係值得一讀嘅文章。
至於Karson買車嘅要求係「因車而異」，例如七人車要講求舒適，跑車就要講究操控同外形，佢仲講笑話，買車有好多車款任佢挑選，遠不如揀女朋友咁複雜喎。Karson索取「汽車世界特別號」後，卓妮又見到名媛何倍倩（Anina）經過索閱，原來佢同Karson一樣都係十六歲就考獲駕駛執照，咪睇Anina嘅外形嬌滴滴，佢自言手握軚盤就係辣妹一名。
何倍倩最愛得意車款
Anina嘅丈夫都係車迷，所以屋企有好多汽車刊物，最鐘意睇車壇新消息及測試報告，閒時兩夫妻可以一齊研究吓。Anina喜愛外形得意嘅車款，佢第一部車就係白色甲蟲車，仲要車廂擺滿公仔嗰種。Anina又憶述最驚險嘅駕駛體驗，就係喺路面遇上冰塊，導致車輛失控打咗幾個白鴿轉，幸好當時公路嘅汽車流量好少，不致有嚴重意外。
卓妮尋日仲見到廠商會副會長吳永嘉（Jimmy）經過，佢話平日都好留意車壇嘅動向，特別係車展嘅報道，故此佢好重視汽車刊物嘅新車介紹。至於名媛李桂蘭（Olivia）就話，香港路況複雜，曾經試過喺觀塘迷路不知所措，所以佢只會喺英國駕駛喎。
卓妮