政情：長毛無懼踎監變短毛
社民連立法會議員梁國雄（長毛），遲啲好可能又要同自己嘅長髮講拜拜喇！事關佢因為去年衝擊替補機制論壇，被判入獄兩個月，如果上訴唔成功，就要即時收監，按《監獄條例》規定，長毛要剪短頭髮。不過，長毛話驚都未驚過，因為佢啲頭髮生長力極強，半年時間頭髮就可以長過頸，回復長毛本色！
長毛未做議員之前，都坐過兩次監，兩次都要「剪髮」，所以坊間傳聞話長毛會挑戰《監獄條例》，實情完全唔係呢回事。長毛尋日話，自己留長髮無特別意思，只係年輕時開始留，覺得幾啱自己咪留到依家囉。佢仲話，無論長髮定短髮，都會繼續抗爭喎。