政情：何周禮人氣勁入房會
夕陽政府尋日公布最新嘅房屋委員會名單，名單入面有八位新人，其中一位就係曾經幫煲呔曾設計深圳「禮賓府」而人氣急升嘅室內設計師何周禮。不過，能夠有機會進身房委會，唔知同事件有冇關，但可以肯定嘅係，將來公屋設計會有星級大師參與，公屋居民有福喇。
煲呔曾早前被揭發租用富商位於深圳嘅東海花園作為退休居所，豪華程度令人咋舌，因而被喻為深圳「禮賓府」，但最後都要狼狽退租收場。話時話，何周禮為間屋絞盡腦汁，依家煲呔曾一句話唔租，業主就將間屋拆晒再改裝，認真浪費。但如果何周禮為本港公屋設計出謀獻策，就可令居民真正受惠。
房委會新委員仲有前建築師學會會長林雲峰及建築系教授陳漢雲等，兩個都係響噹噹重量級人士。