中環出更：湯修齊終極一擊 圍城送暖
尋日周末難得風和日麗，博愛醫院主席湯修齊（Henry）同候任主席潘德明等一眾高層，上午就聚集天水圍天晴邨，齊齊見證「博愛醫院香港旭日扶輪社家庭發展中心」開幕，為被視為「悲情城市」嘅圍城婦女、青年及兒童，提供技能培訓、託管等支援，呢個項目係Henry離任前最後一擊。
捐建家庭發展中心
由於今次係Henry在任最後一次大型公開活動，難怪佢咁着緊。Henry話，天水圍係全港年輕人最密集嘅地區，尤其係天水圍北，有大量新來港人士及低收入家庭兒童聚居，對支援家庭、婦女及兒童嘅社會資源需求好大，所以博愛同旭日扶輪社合力捐建家庭發展中心，希望為區內居民送上溫暖。
尋日好多嘉賓及博愛高層現身撐場，包括靚女總理趙瑤同老公林辰峰（Sam）。趙瑤爆料話，阿Sam係台灣人，從未去過天水圍，所以對悲情圍城感到好奇，成日問佢天水圍係咩樣。下個月將加入博愛做總理嘅阿Sam，尋日終於親臨其境，趙瑤笑稱，天水圍咪同香港其他地區一樣囉。