政情：理大生借全民投票抽水
由港大民意研究計劃搞嘅特首選舉全民投票尋日舉行，由於爆出黑客入侵投票網站事件，吸引大批傳媒前往位於紅磡理工大學嘅主要票站採訪。期間有幾名理大學生前來踩場，其中一位社會政策及行政學系學生李同學，更加帶埋送殯用嘅花圈同身穿麻衣到場，擺到明係想嚟玩嘢。
在場記者最初以為班理大學生係想抗議特首小圈子選舉，點知最後卻反高潮，原來佢哋係想抗議法庭早前判處「長毛」梁國雄同多名學聯成員，需為衝擊替補機制諮詢論壇入獄，諷刺香港法治已死，同今次全民投票嘅主題完全無關。其實呢班學生哥專登揀喺尋日朝早到理大嘅全民投票票站示威，估計係貪嗰度記者多，肯定見到報。