今屆特首選舉過程中精彩絕倫，真係拍戲都無咁多變奏。適逢立法會下個月底舉辦議員與記者同樂日，大家都準備搜羅今次特首選舉內容做節目，等大家食唔飽都笑餐飽。為咗遷就特首選舉，同樂日將會定於下個月廿七日星期五舉行，暫時報咗名會出席嘅有三十五人咁多，當中有十六個議員好慷慨，自掏腰包送出禮物作為抽獎及玩遊戲之用。
今年同樂日節目離不開「有口難言」、「收買佬」及「猜猜誰」呢啲適合人多一齊玩嘅遊戲。不過，要數到最精彩嘅相信係議員同記者粉墨登場，扮演三位特首候選人何俊仁、唐英年同梁振英喺兩次辯論嘅精彩片段。老實講，三人嘅人物性格同特徵都相當突出，要扮佢哋無乜難度，反而扮嘢過程中少不免放大三人嘅缺點，當佢哋見到自己被人醜化，唔知會否感到尷尬同唔高興呢？