政情：長毛狠批民記無恥
民建聯經常被外界批評對政府包庇護短，其實係有原因嘅，好似有立法會議員提出動用特權法調查煲呔曾貪盡海陸空醜聞，面對咁大是大非嘅問題，該黨竟然反對調查。不過，對於因為抗議替補機制假諮詢而被判囚兩個月嘅社民連議員「長毛」梁國雄，該黨竟然要求內務委員會就啟動罷免程序進行討論，意圖罷免長毛，如此雙重標準，被長毛狠批「廉恥係無得教嘅！」
長毛前日被判刑後即時上訴，依家只係保釋外出，不過立法會討論罷免長毛嘅聲音已經開始醞釀，但不獲泛民主派支持。白鴿黨代主席劉慧卿話，一直好反對暴力，但由於長毛已經受到法律制裁，唔覺得需要罷免佢。工黨主席李卓人就話，長毛今次只係反對替補機制進行「封閉式諮詢」，係運用選民賦予嘅力量，如果市民唔滿意，下屆立法會咪唔投佢票囉，無需要由立法會決定長毛嘅去留。
取態兩極 雙重標準
泛民肯撐長毛，唔代表班建制派願意放生。一直視長毛為眼中釘嘅民建聯，主席譚耀宗話現時仲未決定係咪罷免長毛，但建議先喺內會討論一下呢件事喎，佢咁講法，咪即係想搞大件事囉。大家唔好忘記，早前民建聯對貪盡海陸空嘅煲呔曾，並無打算再追究，就算有議員建議用特權法去徹查事件，該黨都唔肯支持，如今打算罷免長毛，話唔係雙重標準都無人信啦！
諗定後着 出嚟開會
不過，長毛本人就反而睇得好開，佢話唔會教其他議員點做，但強調自己當日反對惡法，並不是為咗一己私欲，仲話如果有人要向佢呢啲一介草民開刀，市民自會有公論喎。
長毛仲諗定後着，就算上訴唔成功要坐監，佢都會要求以議員身份出嚟開會，因為《基本法》講明無人可以阻止議員去開會嘅，就算雙手帶住孖葉，都要繼續履行議員職責。佢又話，如果坐監之餘又被人罷免，日後必定繼續抗爭，一定去立法會公眾席搞事喎。