中環出更：呂鈞堯孖黃英鵬 享受不平「帆」
夏天好快就到，又係玩水上活動嘅好時機，好似坐船出海咁，原來唔一定只係坐遊艇，其實體積較小嘅帆船，都係唔錯嘅選擇。從事紙品生意嘅香港青年企業家協會會員呂鈞堯（Quincy）同老友黃英鵬（Simy），月前取得克羅地亞帆船Salona嘅亞洲區代理權，並改名為「賽龍」，皆因係比賽專用嘅帆船，但同時又可用作消閒，兩者優點兼備，佢哋日前就邀請卓妮上船參觀。
Quincy同Simy都係水上運動發燒友，閒時愛出海游水同滑水。Simy十幾歲開始接觸帆船，一試就愛上，因帆船係以風力發動，既冇難聞燃油味又夠環保，之後佢仲考埋帆船執照添！Quincy自言受Simy啟蒙，漸漸愛上線條一流嘅帆船，依家積極諗住考番個帆船執照。
度身訂造 五臟俱全
對帆船甚有研究嘅Simy話，Salona全港暫時只有兩艘，當日佢介紹嗰艘屬於最新型號，價值二十八萬歐元（約二百八十八萬港元），用料設計全部度身訂造，麻雀雖小但五臟俱全，有三間睡房、客廳、廚房及洗手間，焗爐、煮食爐、雪櫃一應俱全，一家大細住幾日都冇問題。
大家唔好睇小呢艘四十一呎長嘅Salona，絕對唔遜色於大型機動遊艇。佢勝在外形同性能俱佳，內籠用超輕嘅碳纖及夾層木板特製，總重量唔夠七噸，能夠喺海上保持高速行駛，普通時速可達十二海里。船上仲裝設咗自動導航系統，只需校好位置同航程，就可印印腳歎海風。
Simy話，佢哋現時組織咗來自五湖四海、約三十人嘅船隊，四月將會去海南島三亞參加船展，嚟緊仲會參加本地賽事。
Quincy就覺得，香港愈來愈多人鍾意玩帆船，所以佢都想借機會推廣吓呢種活動，未來仲打算引入更加多嘅船隻，並與團體一齊合作，讓年輕人可以免費體驗一下坐帆船嘅樂趣喎。
卓妮