政情：九倉繪畫比賽 學生創意無限
致力推動藝術發展嘅九龍倉集團，去年首度舉辦全港中學生繪畫比賽，反應踴躍，收到逾一千八百件作品。該集團尋日就喺旗下商場舉行頒獎典禮，邀請咗政務司司長林瑞麟、九倉集團執行董事李玉芳（Doreen）擔任主禮嘉賓，佢哋都大讚時下嘅中學生，竟然可以創作出咁高水平嘅畫作。
Doreen話，當佢第一次望到啲畫作時，真係覺得好驚訝，發覺學生對社會同身邊事物非常敏感同成熟，創作主題亦好廣泛。冠軍作品《茶餐廳》，由就讀循道中學中三嘅陳利亭創作，將茶餐廳呢個極具本土特色嘅飲食文化表露無遺。今次比賽嘅得獎者除可獲贈現金獎同書券外，仲有得去台北交流文化藝術。比賽入圍作品由尋日起至四月六日喺集團旗下三個商場作巡迴展覽。