中環出更：家己冷好眼光 馬場袋袋平安

搞盃賽慶90周年

為慶祝潮商九十周年，潮人搞場盃賽高興吓。「綠豆爽」賽前未算大熱，但廂房內，人人爭住落飛，身為馬主嘅莊學山笑逐顏開，分享「相馬」心得。

佢帶埋古董望遠鏡，細味年輕時跟隨「鐘錶大王」父親莊靜庵入馬場。佢發現，高頭大馬未必係好，馬匹頭形偏小，眼神忠心堅定，先係千里馬。今次相中「綠豆爽」，都算有緣分。愛駒出戰第四場，佢一於落注買二百元「位置」，結果袋幾百元彩金。

「綠豆爽」以第二名衝線，馬主陳幼南同太太（右一、右二）特別興奮。（徐家浩攝）

胡劍江（左）將彩券送贈嬌妻，認真識做。

潮屬社團總會主席許學之都有嚟捧場，小注怡情；「綠豆爽」嘅馬主包括張詩培、張俊勇都有撐自己場，最後統統有錢收。

潮商副會長胡劍江（Michael）就採取「漁翁撒網」策略，落注全日賽事。咁搏，只為氹嬌妻Maggie一笑。佢話買中邊場，就將彩券送畀太太，等佢去領獎。所以話，潮州男人，絕不大男人！

同場仲有潮商會董兼藍帶啤酒亞洲區總代理葉振南。Stephen預告，同細妹嘉齡花費逾百萬元購入嘅英國駿馬，已運抵香港，取名「靚酒王」，同佢經營嘅紅酒及啤酒生意，夾到極。

卓妮