石躉阻路 單車客不便
政府地盤石躉橫切單車徑，單車使用者隨時撞埋牆！劉先生早前踏單車途經粉嶺時，發現一政府地盤外有石屎躉「切斷」單車徑，「成座石屎躉打橫起喺單車徑度，好似封路咁，搞到我差啲撞埋去！」
建築署發言人指出，有關地盤外四周加置的圍板、有蓋行人通道及相關石屎躉皆為保障行人及單車使用者安全而設，事前亦有徵詢相關部門意見。接獲轉介後，考慮石屎躉或對單車徑使用者構成不便，已指示承辦商拆除部分石屎躉，以保持單車徑暢通。
北區區議會交通及運輸委員會主席劉國勳認為，建築署在事件上明顯考慮不周，「呢個工程項目係近期最差嘅一個，完全冇同區議會溝通過點進行！」劉國勳要求部門須提高透明度，盡量減低對居民造成影響。