煲呔曾四十五年公職生涯，仲有四個月就正式退休！如今因貪到入骨入血，香港市民怒吼要佢下台！衰收尾已成定局。
煲呔曾唔係完全無貢獻，起碼從佢身上，我們睇到乜嘢叫「人心不足蛇吞象」，公職人員反思權力令人腐化，更要嚴以律己，切勿貪威識食。作為領導，要受人尊敬，當如《左傳》所言：勤恤其民，而與之勞逸，是以民不罷勞，死知不曠。譯成白話，大意是說，在上的勤懇地體恤百姓，並與他們同甘共苦，因此百姓不感疲勞，即使為國而死也知道不是徒然地死去。
孟子也說了個故事，指子產主持鄭國的政事時，曾用自己所乘的車輛幫助別人渡過溱水和洧水。不過，在孟子看來這只是小恩小惠，子產不懂政治。如果十一月修成走人的橋，十二月修成走車的橋，百姓就不會為渡河的事發愁了。
換言之，君子把政治搞好了，他外出鳴鑼開道都可以，怎須一個一個地幫助別人渡河呢？
煲呔曾治港七年，任內吹水認叻，一味往自己臉上貼金，私心太重，用人唯親，此「士所以不至」，香港有乜辦法唔搞到妖氣沖天，沉淪失勢啊！真正有本領的，又怎肯出來同佢拚搏，何況煲呔曾剛愎自用，日夜掛住坐富豪飛機、遊艇，連落區食個蛋撻都懶！全方位貪腐，「款待門」又唔肯坦白交代，道歉又唔認錯唔鞠躬下台，全港市民根本唔會就咁算！一日不下台，一日有示威！