中環出更：仁濟慈善晚會 舞林高手雲集
仁濟醫院前晚舉行周年慈善餐舞會，候任仁濟主席梁昌明同幾位靚女大跳標準舞，加上「靚次伯」酒莊（Chateau Lynch-Bages）莊主Jean-Charles Cazes捐贈多支限量珍藏紅酒予大會拍賣，因而輕鬆籌得善款近二百萬元，以支持仁濟各項服務基金運作。
卓妮見梁昌明喺台上跳起舞來功架十足，原來佢啱啱接任體育舞蹈總會會長，平時訓練有素，難怪咁好身手。當晚大會邀請咗亞洲國際標準舞大師周志坤同高徒名媛蘇嘉怡演出拉丁舞，佢哋以精湛嘅舞藝，博得全場掌聲雷動。原來佢哋都有幫梁昌明排舞，仲大讚對方好有舞蹈潛質添。
李文斌卸任 忙家族生意
將於四月接替李文斌（Edmond）擔任主席嘅梁昌明，係明美實業主席，Nikon、任天堂、Motorola等企業嘅電池供應商，佢預期上任後會好忙，希望可以兼顧到公務喎。至於即將卸任嘅Edmond，佢話終於可以放下心頭大石，但仲未可以鬆懈，因為接住又要睇住盤家族生意，經常中港兩邊走，幸得太太Amanda全力支持。
晚會嘅重頭戲係拍賣環節，拍賣「靚次伯」酒莊捐贈嘅多支紅酒，大家都踴躍競投，其中梁昌明同前仁濟主席錢曼娟分別以廿多萬元投得一支靚紅酒。「靚次伯」酒莊莊主Jean-Charles Cazes話，見到香港善長咁慷慨解囊，真係大開眼界。
當晚有唔少名人去湊熱鬧，好似圓玄學院主席陳國超、富士高集團主席楊志雄一家、前仁愛堂主席史立德夫婦、「工廈大王」楊耀松長子楊國佳等，相當熱鬧。
卓妮