政情：梁高美懿唔排除從政
恒生銀行女大班梁高美懿突然放棄高薪厚祿，宣布於五月十一日正式離開服務咗三十四年嘅滙豐集團，令人大跌眼鏡。有傳言話佢退休後將加入政府工作，佢大方回應話，對於日後從政或者返銀行機構持開放嘅態度。被問到有冇特首候選人向佢招手，佢就笑笑口話：「咁好想像力嘅？」
梁太尋日出席恒生公布業績後翌日嘅例行記者會，大家好關注梁太未來嘅動向。佢話退任後想抖吓先，去吓旅行、學吓嘢，不過佢有好多公職在身，所以估計都會好唔得閒。
佢語帶玄機話，下個月有朋友約佢去旅行，時間都仲OK，但係九月要睇吓情況喇！咁會唔會從政呢？梁太就話態度開放，即係唔排除有呢個可能性喇！
梁太唔止係銀行女大班咁簡單，佢係福建人，其成就早就被全港一百幾萬名閩籍人士引以為傲，如果由佢入主金管局或財政司，專業能力自然冇問題，民望分分鐘都高過現任司局長添！身為選委嘅梁太並冇提名唐英年及梁振英，唔通佢已有心水，為將來埋班做準備？