中環出更：蔡李惠莉嫁女 勾起那些年
近排城中盛傳，「玩具大王」蔡志明細女蔡加怡（Crystal）將與男友Jeremy結束愛情長跑。前日喜運佳集團舉行春茗，蔡家上下齊出動，Jeremy亦有現身，同卓妮大方承認準備下半年結婚。
Jeremy話，同Crystal相識五年，拍拖一年半，覺得結婚嘅時機成熟。不過確實嘅婚禮日期、地點及婚禮細節都仲計劃緊。蔡家人見男主角自爆機密，唔使再守住秘密，個個都鬆晒。蔡太李惠莉仲話支持囡囡早日拉埋天窗。
蔡志明喇叭褲行沙灘
Crystal生得咁甜美，唔知係咪得到靚媽咪嘅遺傳基因？蔡太聽罷，即刻喺手機打開相簿畀卓妮睇，一張張佢同老公當年拍拖、結婚嘅相片呈現眼前。大女加敏都爭住睇真啲，佢未見過呢輯相，話要睇吓自己似爸爸定媽咪多啲。那些年蔡太簡直靚到爆燈，蔡志明着條紅噹噹嘅喇叭褲與蔡太行沙灘。蔡生牙擦擦話，想當年廿四吋腰、四十一吋胸，梗有型喇！
當晚鐘錶界大佬亦齊撐場，包括鐘錶業總會新任主席區宇凡、老行尊孫秉樞及寶齊萊代理商曾國雄。喜運佳常董梁青華笑稱，啱啱同曾國雄等老友一齊競投馬會拍賣嘅靚駒「張家界」，尋日揭盅如願中籤，認真夠運。
啱啱升任喜運佳主席嘅蔡加讚帶埋女友汪圓圓溫馨撐場。加讚話，去年集團嘅分店已增加至三十間，今年將會再開多十間分店。
卓妮