政情：收紅酒大禮 煲呔曾難甩身

煲呔曾為官多年，素來同紅酒呢啲貴價玩意沾不上邊，不過近日佢被質疑，以二百萬元將私藏名酒賣畀詹康信，事後就聲稱以老婆曾鮑笑薇名義，將嗰二百萬元捐畀同佢兩公婆關係密切嘅幾個慈善機構。特首辦前日急發聲明，砌詞話煲呔曾就快退休，所以前年捐出藏酒，但到底點解佢會有咁多藏酒、究竟賣咗幾多支酒、每支酒嘅牌子、價錢及出售日期等，特首辦都冇交代。

禮賓府焗開Lafite招呼

本報尋日報道過，連日來為咗護短、不惜反過來質疑傳媒報道真確性嘅金勞詹，○六年曾經饋贈紅酒畀煲呔曾。話說○五年煲呔曾喺禮賓府宴請金勞詹，游說對方支持政改方案，席間金勞詹嫌棄煲呔曾只以蘿蔔糕同炒粉絲待客，煲呔曾惟有死死地氣，開支諗住退休後自己慢慢歎、當年市值萬三蚊嘅八二年Lafite法國紅酒，塞住金勞詹把口。

之後金勞詹禮尚往來，送咗一箱共十二支嘅法國靚酒Chateau Margaux畀煲呔曾，但事後金勞詹話，煲呔曾喺感謝卡上表示，只係多謝佢送咗一支紅酒。尋日我哋就事件問過金勞詹，佢承認當時確實送過一箱酒畀煲呔曾，但強調係託朋友送去，連佢自己都未見過箱酒喎。至於點解煲呔曾只係收咗一支？佢就話煲呔曾當時稱收一箱唔得，一支就得喎，至於其餘十一支去咗邊，金勞詹耍手擰頭話唔知，估計係畀咗其他人啩。

睇到呢度，相信大家都睇到金勞詹同煲呔曾沆瀣一氣，互相你請我、我益你，無他嘅，金勞詹喺董建華掌政年代坐過監，唔知係咪對老董懷恨在心，等老董腳痛落台後轉投煲呔曾懷抱，於是乎咪同撈同煲囉！煲呔曾收咗人成箱靚酒後，只申報咗一支，至今有十一支就下落不明，現時每支市值約過萬元，涉及金額以十萬元計，究竟佢袋咗落袋，定係賣咗畀人套現？之後金勞詹仲有冇繼續送酒畀佢呢？其他人又有冇送酒畀佢呢？有咁多疑團，立法會同廉政公署唔查佢又點得吖！