中環出更：東華籌款夜盡展紅色魅力
東華三院前晚喺尖沙咀洲際酒店舉行慈善晚會，以「Red Night」做主題，為旗下廣華醫院籌募擴展服務經費，成功籌得二百多萬元。當晚一眾董事局成員響應紅色主題，主席張佐華以紅頸巾嘅上海灘造型搶鏡，總理馬陳家歡、曾楊淑貞、黃業光則分別着上鮮紅色長裙、斗篷及煲呔，盡展紅色魅力。
當晚籌委會主席陳文綺慧（Viola）就穿上一襲雪紡白色長裙配紅腰帶，耀眼中見清麗。Viola話，是夜以紅色做主題，係因為東華剛剛過咗一百四十歲生日，希望今年好似成長中嘅青年咁，繼續充滿活力同動力咁發展喎。卓妮問佢近來忙乜，佢笑言近期忙於追看「八卦」新聞，梗係啦，關乎香港嘅未來喎！
施榮恆唔知葉劉選特首
副主席施榮恆（Ivan）同太太恩愛現身，Ivan話佢上星期去完上海公幹，忙到連報紙都冇時間睇，佢身邊嘅施太仲笑笑口話，老公連新民黨主席葉劉淑儀參選特首都唔知，真係搞笑。
卓妮仲見到總理李鋈麟着上Bogosse棗紅色西裝，係購自法國康城。佢打嘅煲呔相當特別，係用紅色同黑色兩隻蝴蝶交疊而成，仲可以雙面使用，要變身參加其他宴會真係話咁易。
卓妮