日日新聞好，當然要追東方！
六蚊雞買份《東方日報》、《太陽報》，真係抵到爛，日日睇到你心花怒放！笑口常開！一句話：過癮抵死！繼《我會歎盡呢份工，我會掘好呢個窿》，笑死！又嚟《歎完飛機歎遊艇，揩油勢要揩到盡》，老朽在夢中，不禁夢囈連連：我要做特首——哪管是「老嘢與熟女」之爭！
前美國國務卿基辛格話：權力是強烈的催情劑。果然有識見。要言之，歎盡份工又好，揩盡啲油又好，人一世物一世，當大部分港人收入輸通脹時，坦白講，無人唔想以六百二十五蚊渡輪價歎富豪過億遊艇、暴食濠江啩？一生歎一次，也不枉了眼耳鼻舌身意隨我一場也！
老朽當然知道，凡事去到盡扭到盡未必好，《牡丹亭》唱詞：「原來姹紫嫣紅開遍，似這般都付與斷井頹垣。」物極必反，有其道理存焉。
有啲嘢去到盡，點講都係一種病態。油水，揩到盡，未必有好結果。孫中山曾經向佢個美國顧問林百克憶述一個終身難忘嘅故事：
話說有個僑商飄洋過海，來到有很多金子的地方，可是那裏也有殺人越貨的強盜，他總是把自己的金子分作兩份，一份放在容易看見的地方，強盜來了任由搶去；另一份藏得很秘密，仍然可以保存下來，他的幾個同伴把所有金子都藏起來，結果被強盜殺害了。
這個故事，老朽願與縮骨治港、油水揩盡嘅煲呔曾分享。