政情：興哥辯論憶亡父哽咽
立法會尋日辯論促請政府制訂全面政策，幫助腦退化症病人嘅家人，平時講嘢聲大大嘅工聯會議員王國興，尋日講講吓突然愈講愈溫柔兼一度哽咽，原來佢憶起同樣患過腦退化症、過咗身嘅爸爸。
興哥話，電影《女人四十》真係帶畀佢好深嘅感受，因為戲中嘅蕭芳芳為咗照顧有腦退化症嘅老爺而心力交瘁。現實中，興哥嘅爸爸亦患有腦退化症，令佢媽媽好辛苦，幾年前佢爸爸喺屋企廁所跌倒失救而離世，之後無幾耐，佢媽媽亦因為癌病與世長辭，顯見佢媽媽為咗照顧佢爸爸而導致身心俱疲。
講到呢度，興哥就一度哽咽，差啲流下男兒淚，但佢強忍淚水，支持要求當局為腦退化症患者設立日間護理及支援中心，使患者得到適切照顧，而且促請政府制訂跨部門、長遠而全面嘅政策應付問題，同時減輕患者嘅負擔。如果夕陽政府仲有良心，好應該聽吓興哥呢個過來人所言啦。