中環出更：鄭志剛難捨細妹出嫁
全國及各省市青聯，日前喺中環一間酒家開Party賀新春，城中富二代雲集。身為全國青聯副主席嘅鄭志剛（Adrian）及陳仲尼（Rock），齊齊擔任派對籌委會主席。Adrian細妹鄭志雯三月中出嫁，榮升大舅，心情靚爆，一早買定神秘禮物。不過，Adrian坦言最錫細妹，妹妹出閣，佢直認好唔捨得。
青聯春茗 抽獎樂無窮
志雯與鋼鐵大王龐鼎元孫仔龐建貽結婚，做阿哥嘅，心情既開心，又不捨，佢話：「我得一粒細妹，梗係唔捨得啦！」話雖如此，Adrian好欣賞未來妹夫，佢自爆兩人相識十數載，大讚對方人品好，細妹認真有眼光喎。
人逢喜事，Adrian好風騷，同Rock拎住疊利是四圍派，每封載住一個朱古力金幣，人人有份。不過，好戲在後頭，Adrian帶頭捐出周大福一萬元現金禮券抽獎，而阿Rock就折現，送出一萬元銀行禮券；百仁基金主席施榮忻亦豪捐兩支合共價值八千元嘅珍品茅台；金利來太子爺曾智明都唔執輸，捐出總值五千多元金利來皮具，總之獎品多到數唔晒。
咁熱鬧，又點少得城中富二代，除咗霍啟剛、霍啟山、中總榮譽會長霍震寰及公子霍啟文外，仲有玩具大王蔡志明公子蔡加讚、觀瀾湖太子爺朱鼎健、廖創興家族後人廖偉麟及富商邱德根孫女邱詠麒等，眾人滿場飛碰杯，相當熱鬧。
卓妮