中環出更：郭太趕返港 撐生命熱線
撫平唔少破碎心靈嘅生命熱線，過去半年接到關於兩性感情及婚姻問題嘅求助電話，竟然多達四成，可見男女感情問題確係好棘手。生命熱線理事會主席、新鴻基地產非執董郭炳湘太太郭李天穎，前日就喺尖沙咀文化中心搞咗場籌款慈善騷，見佢精神奕奕現身撐場，原來佢啱啱去完新加坡探望愛女，為咗今次籌款活動，幾忙都要趕返港喎。
霍麗萍遊道教名山
慈善騷吸引好多城中名人捧場，全場爆滿。已故全國政協副主席霍英東嘅大女霍麗萍（Pat）亦嚟撐場，熱愛攝影嘅阿Pat啱啱喺惠州羅浮山度假返港，當地係享負盛名嘅道教十大名山之一，有千幾年歷史。Pat好鍾意捕捉光線之美，去年仲舉辦過「靈光」攝影展，佢此行都影咗唔少日出及日落嘅剎那靚景。
膳心連（Foodlink）創辦人黃林碧瑢都喺度，佢幫手生命熱線籌款多年，同郭太係多年老友，依家郭太仲做埋膳心連主席，兩人拍住將酒店食肆剩餘嘅新鮮食物送畀貧困人士嘅功德發揚光大。黃太話，希望城中善長仁翁繼續捐輸，令機構嘅愛心得以延續。