活了一把年紀，老朽但知要放大船，必須先找到水深的地方；而要睇縮骨神功好戲，就要找煲呔曾吹水的前言後語！
呢！不久前煲呔曾才大言炎炎話歐債危機最好喺佢任內爆發，等佢解決咗免留後患畀下屆接任特首，吹到自己仲叻過力拔山河氣蓋勢嘅項羽，被輿論彈佢不自量力。之不過項羽叻極都要自刎烏江，而煲呔曾卻可逍遙到最後一秒！睇嚟佢都係「命好」之徒。
嗱嗱嗱！日前佢又祭起縮骨神功，喺大氣電波話今次歐債危機跟以往不同，傳染性很大很快，見唔到解決方法……單靠亞洲的動力去拓展，情況前所未有，確實值得擔憂。
縮得快，好世界！係煲呔曾任內六字真言。不過，臨收山但見佢動作多多，為了「挺唐插梁」，連十年前嘅舊史都拎出來講，以為往事並不如煙，其實就正如同文所講——根本就係濕水炮仗，好心佢做咗七年幾長官，又自詡係「政治家」就唔好咁小學雞喇！政治回歸現實，亦常識而已。
最近中港矛盾不斷升溫之際，佢竟然踩港人外遊講嘢大聲，食飯周枱骨，又撐自駕遊，引內地高官話司機駕車由內地進入香港即變得守法，老朽但知有啲嘢係一種先天嘅習慣，加上後天嘅教養，一入咗血液，就一世難改！
煲呔曾在香港吹水放言，唔通佢出外逍遙做離岸特首就會變恭而有禮嘅君子？明白「君子固窮」、「君子不黨」嘅道理？聽其言觀其行，打着煲呔吹水，難道亂噏都神聖不可侵犯？