政情：平叔教路學好通識
曾任教育統籌局局長嘅王永平，雖然佢三番四次話唔贊成通識科要考試，但係原來佢都撐通識科嘅，尋日仲同班學生哥分享。平叔話，孔子時代都唔係齋讀書，如果學好通識嘅話，無論升大學、搵工面試都冇問題。佢仲拍心口話，如果同學將來中、英文同通識都叻，但搵唔到工嘅話就去搵佢喎，「我保證有工畀你做！」
想通識科高分最緊要了解時事，睇下周圍發生緊乜嘢事，可惜啲學生哥成日話功課多，睇唔切新聞。平叔就話︰「大家都玩iPhone o架，了解下Steve Jobs（喬布斯）係咪真係咁悶先？上facebook時睇埋新聞係咪真係咁難呢？咁多內地孕婦、D&G事件、孔（慶東）教授講嘅嘢，係咪真係咁悶呢？」一句到尾都係要培養個人習慣喎。
考評局早排舉例提出一條通識題，要求考生評論特首參選人唐英年批評八十後嘅「車毀人亡」論，平叔教路，話先要答唐唐點解咁講、講法係咪正確，政府有冇自我反省。不過，答題目都要有個結論，平叔就話︰「最簡單嘅結論係話我覺得佢（唐唐）不智囉！」