中環出更：肥胡爆伍穎梅馴服男友
智經研究中心日前搞新春團拜，卓妮見到身兼智經理事嘅「九巴金公主」伍穎梅（Winnie），新年流流，梗要追問佢幾時同中建企業董事男友許晉平拉埋天窗、明年係咪有機會派利是？點知佢例牌甜笑唔答，話到時一定通知卓妮喎！
同場嘅智經主席胡定旭（肥胡）一聽到卓妮同Winnie嘅對話後，就幫口解圍，話想派利是幾時都派得喎，只要開心就得喇！不過，話口未完，肥胡就爆料話，Winnie睇得男友好實，有次佢想同許生飲酒，許生要用眼神同Winnie交流，得到批准後至飲得喎！
李國棟想管馬會廚房
當日馬會大董李國棟醫生都在場，佢都係智經理事之一。Winnie話，李醫生經常帶隊捐窿捐罅去搵好嘢食，確係識飲識食，但李醫生就笑自己貪飲貪食至真。
原來李醫生有時會自創菜式叫馬會廚師特別炮製，例如麻辣蝦膠等，卓妮問佢呢個大董係咪分管廚房事務，佢聽罷大笑，話自己都好想，可惜馬會董事冇呢個職務呢！