中環出更：陳碧華投恒隆 刪「金」邊轉運？
如果大家仲記得嘅話，三個月前有讀者向卓妮爆料話，八達通前行政總裁陳碧鏵未坐暖無綫電視國際業務總經理個位，又密謀過檔恒隆地產，原來消息確係堅料，女主角已於去年十二月初返工，出任恒隆地產租務及銷售董事。佢仲改埋名，將「鏵」字改做「華」，唔知係咪個「鏵」字啲金多得滯帶來麻煩，所以刪掉祈求浴火重生呢？
現身百貨店開幕禮
卓妮喺恒隆地產最新一期刊物《連繫恒隆》中，發現久未露面嘅陳碧華倩影。事緣上月初，佢同恒隆董事總經理陳南祿齊現身集團位於西九龍嘅碧海藍天商場，參加JUSCO百貨店開幕儀式，同場仲有四洲集團主席戴德豐、婦協主席林貝聿嘉等人。女主角笑容滿面，仲一身粉紅色套裝，唔通佢個鏵字刪咗個「金」字部之後都未夠，仲要靠屬「火」嘅粉紅色剋金？
卓妮問過恒隆嘅公關姐姐，佢話人事部嘅資料顯示「陳碧華」個寫法冇錯，至於點解就話唔知喎！不過，龍年新希望，卓妮都希望陳碧華嘅事業運喺新一年有新氣象啦！