中環出更：東華團拜最想重建廣華
東華三院尋日舉行新春團拜，主席張佐華同一眾董事局成員齊齊現身切金豬，非常熱鬧。講到新年願望，大家都異口同聲希望預算案撥款支持東華旗下嘅廣華醫院重建計劃，以惠及更多基層市民。不過，其實佢哋已知廣華重建計劃會實現，事關今日預算案會公布之餘，東華尋日亦預告今日會開記者會交代廣華重建計劃。
東華三院總理李鋈麟（Alan）一身唐裝打扮出席團拜，夠晒節日氣氛。除咗重建廣華醫院外，Alan仲希望預算案可以重點發展中醫藥服務，因為佢媽媽一向只係相信中醫，自從廣華醫院引入咗中醫藥服務之後，佢媽媽求診又多咗一個選擇。
李鋈麟鍾情中醫藥
卓妮同Alan傾開，原來佢啱啱同朋友去咗韓國三日滑雪，叉足電返港，唔怪得成個人咁醒神喇。
卓妮尋日喺團拜上又仲見到副主席施榮恒（Ivan），佢着上黑色Boss燈心絨西裝撐場，同東華條紅色呔襯到絕。近日中港兩地矛盾加劇，Ivan話大家都係中國人，應該要互相包容；佢又話自己經常都會去上海公幹，當地人知道佢唔識上海話，都會遷就佢講番普通話，所以佢覺得並非所有內地人都咁差嘅。
卓妮