今年是龍年，龍的傳說也特別多，玄學家只要扯條龍鬚，都可以瞎說到日月無光。《爾雅‧翼》描寫龍的模樣為「頭似牛，角似鹿，眼似蝦，耳似象，腹似蛇，鱗似魚，爪似鳳，掌似虎」，阿哥，即係話龍——其實乃雜交而成。
信不信由你，反正老朽就信了。據稱，龍「遇牝必交，如得牛則生麟，得豕則生象，得雉則結卵成蛟」。總之，龍博愛至極，極熱愛課外活動，殆無疑問。老朽愛讀閒書，關於龍的傳說，看過的，真是雜樹生花，各家各說，各自描述，各自精彩。要言之，龍呢種動物，可以解釋為蛇、為鱷魚、為恐龍、為穿山甲、為長頸鹿、為牛、為豬、為雲霧、為閃電、為生殖器……
一種動物，可以令人發揮無窮想像，唔好話「玄學家」可以搵佢借題發揮，老朽一樣靠佢發揮聯想，幾過癮。
講開龍，通常「異人」出生，尤其未來「皇上」誕生，不管白天與黑夜，不理風雪與雷響，總之，必然「赤光繞室，恍如白晝」。咦！咁唔環保，咁唔低碳，你講緊煲呔曾嘅禮賓府？聰明！原來煲呔曾居住嘅禮賓府，每月電費二十萬係有道理架！此乃「皇府氣象」，點止派頭咁簡單！
閒話提過，今年出生的龍子，未知誰個「命好」，將來會為祖國幹一番事業。之不過咁，做龍媽的若然不是餵母乳，龍子自然領略唔到「滴滴鮮濃，回味綿長」，飲蒙牛又提心吊膽，龍胎未出，只能叫龍爸來港四出撲奶粉！