車公靈籤究竟靈唔靈？電台上年幫五大政黨求籤，今年睇番，發現準確度高達九成。好似民主黨就被批「世人難識真和假，真假如何兩不分」。準成咁，有啲嘢真係唔到你唔信。
社民連去年由內鬥到分家，最終得番長毛梁國雄一個議員，同車公批上年嘅第七十八籤下籤不謀而合，嗰支籤嘅籤文係咁嘅：「尋春子弟過江山，進退不得半道難；峰高海闊崎嶇阻，望斷江河未得還。」其中「進退不得半道難」講中晒社民連嘅境況，至於自由黨，車公話「朱門雖富不如貧，取得黃金卻損財」。自由黨雖被稱為富貴黨，但維持落去都唔容易。
車公幫民建聯求到中籤，籤文：「頃畝之田歲月深，祖宗創積到於今」，即係話民記要靠祖宗「祖蔭」先可以生存，完全中晒。到民主黨，更中到應一應。民主黨係第六十九籤中籤。籤文「真似假時假似真，弄假成真那曉因」，解作「糊裏糊塗、認賊作父」，咪即係講緊民主黨上年行入中聯辦商討政改，點知畀市民鬧到狗血淋頭囉。