政情：嫻姐KK赤口鬧爆政府
尋日係大年初三，工聯會副會長陳婉嫻同立法會議員黃國健（KK）就喺黃大仙派風車同賀年書籤畀班街坊，氹得班街坊好開心。不過唔知係唔係因為「赤口」，講到年初二求香港運程嗰支車公靈籤時，嫻姐同KK都忍唔住口鬧夕陽政府。KK仲話，政府仲係咁hea吓hea吓，中籤都變下籤喇。
尋日朝早雖然又凍又落雨，但為咗見班街坊，嫻姐着兩件羽絨出動。講起前日鄉議局主席劉皇發幫香港求嗰支中籤，嫻姐即時扯火，話市民咁多衝擊行動，夕陽政府都唔可以怪責市民，又話因為政府無所作為，先會搞到香港人畀人睇死，所以政府一定要求變，仲提醒啲特首選舉參選人，佢哋如果唔打算改變政府就唔好參選，話「唔好再嘥我哋五年！」
至於車公靈籤提到嘅「神」同「鬼」，KK就話籤文未必係講人嘅，又話求得中籤可能係寓意香港將會多變數，「政府肯改嘅咪上籤囉，仲係咁hea做嘅話就變下籤架喇。」