政情：法式醉拳唐唐至啱玩
特首選舉參選人之一嘅唐英年睇嚟手無搏雞之力，估唔到佢鍾愛嘅「課外活動」都有激烈一面。尋日赤口，佢就去咗拳館練自由搏擊。雖然佢話學咗四年，但都係姐手姐腳，唔止出拳無力，踢腿速度仲似慢鏡重播。其實都唔怪得佢嘅，佢最愛係法國紅酒，如果換轉打醉拳，仲要係法式嗰種，咁就啱晒佢嘞。
唐英年前日叫完湊佢大嘅家傭美姐出嚟做騷，尋日又嚟一次，仲唔知係唔係親疏有別，只通知咗部分傳媒去拳館做採訪。唐唐自爆學咗四年拳，更即場施展四年嘅功力。唐唐可能掛住做其他課外活動，學藝未精，打幾下已經喘晒氣，仲要勞煩老婆幫佢抹汗，又遞水畀佢飲，少爺性格出晒嚟。
「紅」拳武者誇口砌低CY
睇唐唐出拳，好似睇小朋友打交咁，尤其係出上勾拳，一啲力水都無。佢連最基本嘅馬步都紮唔穩，踢腿時以為睇緊慢鏡。既然佢屋企收埋無數紅酒，不如將啲紅酒擺喺地做梅花樁，練好個馬步先啦。
唐唐咁水皮，完全唔怪得佢，試下練「法式醉拳」就啱晒佢嘞，佢拎住支八二年Lafite，一邊飲一邊當武器用，醉醺醺條條Fing咁打，唔打得都笑得嘛！又或者佢應該練洪拳，不過唔係洪水個洪，而係紅酒個紅囉。
唐唐軟手軟腳，但把口就好硬。佢事後誇下海口，話如果上到真正擂台，應該可以砌低另一參選人梁振英喎。同樣係參選人嘅民主黨何俊仁就睇唔過眼，鐵頭仁話自己學過詠春，一眼就睇穿唐唐係打緊花拳繡腿，分分鐘連自己老婆都打唔贏。鐵頭仁仲爆料話唐唐口齒不清好論盡，事關佢早排同唐唐去港台錄影節目，唐唐錄先，但由於NG咗好多次，一個三分幾鐘嘅節目，最尾錄咗成個幾鐘，搞到鐵頭仁等足個幾鐘，好無癮。
唐營諗埋打拳呢啲方法爭取曝光，對唐英年有無幫助真係無人知。梁振英尋日無選舉活動，反而公民力量十幾人去咗梁營競選辦示威，要求政府增建公屋，而競選辦主席張震遠仲親自去收請願信，呢啲咪叫誠意囉。