中環出更：賴李承美偕台胞 食開年飯
尋日沙田馬場人頭湧湧，唔少城中名人冒寒入場討個好意頭。喺香港定居逾三十年嘅港澳台灣同鄉會會長賴李承美，尋日中午同家人及留港度歲嘅台灣駐港機構台北貿易中心總經理劉錫威夫婦，現身馬場食開年飯。春節假期話咁快過完，食完飯大家就要全情投入工作喇！
同枱食飯嘅仲有賴太老公、前港澳台灣同鄉會會長賴建成、大女賴明潔及女婿譚錡鋒。賴太係同鄉會成立廿幾年嚟嘅首位女會長，先生亦做過會長，兩人服務鄉親嘅熱誠好一致，認真難得。
搵原住民表演解鄉愁
賴太話，嚟緊三月同鄉會將舉行春茗及就職典禮，佢搵緊台灣原住民青年嚟港表演助興。此舉既可畀故鄉年輕人出外體驗嘅機會，又可慰藉旅港鄉親，夠晒心思。
雖然今個春節天氣濕冷，但有鄉情搭夠，難怪劉錫威個心零舍暖笠笠。佢調派來港五年，已過慣港式新年，今年囝囝由上海返港度歲，囡囡仲喺香港讀大學，一家四口於他鄉團圓度歲，別有一番滋味。