中環出更：揸Fit放煙花 雙李龍咁威
新春煙花前晚照亮維港夜空，逾三萬九千枚煙花如「龍珠」般綻放光芒。龍之煙花由灣仔中西區工商業聯合會獨家「科水」，主席李鋈麟同會長李三元認真夠面子。
李鋈麟心情靚爆，佢預測龍年恒生指數如飛龍在天，但樓市因內地銀根收緊，想彈都彈唔起。
初二晚，灣仔工商聯雙喜臨門，揸fit放煙花之餘，仲係第二屆董事局就職，逾二千賓客到賀。人氣高漲，場內雙雙對對，唔少仲係一家大細。前東華主席李三元（John）與太太李周美枝、大仔曠怡（Jason）、細仔仲怡（Jamie）齊出動。
阿John穿上Dior新西裝，配襯Zegna領呔同新眼鏡，形象煥然一新。睇煙花，佢話安坐家中最正，事關屋企大窗對正維港，視野無敵。但今年由佢哋商會贊助，梗要支持，細仔Jamie仲出動私伙新相機添。
李鋈麟同弟弟李鋈發都帶埋家人撐場，仰望繽紛夜空，李鋈麟睇到眼濕濕。佢語帶激動話，兒時家貧，每次睇煙花騷都開心到震，今次由自己出錢放，好似發夢咁high。
霍啟文拒談爭產風波
中華總商會榮譽會長霍震寰公子霍啟文都冒寒嚟觀賞煙花，爸爸捲入家族爭產風波，佢唔願多提。
啟文喺英國讀書時，主修會計及經濟，返港後做爸爸身邊嘅得力助手，係叻仔一名。
卓妮