【本報訊】年初三賀歲馬昨日開鑼，有香港賽馬會電話投注部員工不滿馬會收緊領取緊急假期制度，趁機發起罷工、按章工作、玩電話三招玩殘馬會，令電話投注部線路異常繁忙，有馬迷投訴昨早撥號逾句鐘都未能接通電話，錯失投注時機，要求馬會盡快解決問題。
早前有電話投注部員工在網上討論區羅列馬會十宗罪，包括不可在賽馬日領取緊急事假、休息時間不足、主管態度惡劣等，更號召員工在初三罷工，不少人在網上響應，亦有員工指昨日請假申請雖被拒，但會按章工作，「落注都慢慢嚟，唔會好似平日咁快手」。
有員工更稱，會發起親友在各場賽事開跑前，齊齊致電投注部「玩嘢」，「開跑前十分鐘打入去問賠率，問完佢開跑時間後話唔好收線，話度緊啲馬仔」、「如是者只要有一百個人全日同馬會玩嘢，就足夠玩殘馬會！」誓要馬會妥協改善員工福利。
不過，有關做法卻令馬迷遭殃，馬迷梁先生說，昨早十一時許開始致電電話投注部，但至十二時多仍未能落注，「個電話一係唔通，一係就錄音留言，redial（重撥）咗幾十次都唔得」，令他錯過十二時半開跑的首場賽事，最終在十二時四十五分才成功落注。
馬會發言人稱，昨日電話投注中心運作正常，並無任何罷工行動，並強調在賽日期間，電話投注需求大增，偶有線路繁忙情況，呼籲馬迷提早投注。