占士狂入3分波大勝馬刺
【本報綜合報道】勒邦占士昨日帶着重感冒出戰馬刺，甫開賽時腳步浮浮，但當球隊出現危機之際，「大帝」在下半場及時好番，仲化身「三分王」瘋狂遠投得分！結果不但助熱火完成「逆轉」，仲大炒馬刺120比98，成功終結3連敗。占士冇人能擋，難怪佢為明星賽期間搞P時，海報都寫上「世界第1籃球員」來形容自己。
患重感冒下半場發威
在韋迪養傷及勒邦占士感冒嘅情況下，熱火開賽後即陷入劣勢，馬刺在完第2節前由丹利格連在後半場拋入遠程3分後，領先熱火14分返回更衣室。不過熱火在第3節全面復甦，其中占士突然「着火」，單節9次起手中7球獨取17分，其中包括3球3分波，助熱火一舉反超前13分。經歷第3節「浩劫」後，馬刺球員信心盡失，最終在半場大幅領先下，全場竟慘敗22分。
攻入全場最高33分，另貢獻10次助攻及5個籃板嘅「大帝」賽後坦言，表現受到感冒所影響，希望呢幾日可以盡快病愈，而佢亦表揚隊友在第3節打出堅韌防守，令球隊能夠逆轉。事實上除占士外，保殊轟入30分，而米克米拿3分球6射6中交出18分，表現確實抵讚。
韋迪獲贈戰神級跑車
雖然勒邦占士未病好，但佢就已經聯同拳擊手梅韋特及喜劇演員奇雲赫特，一同為明星賽周末期間搞P癲番晚！從佢哋製作嘅派對海報上，就用了「世界第1籃球員」來介紹搞手占士，似乎自大咗多少喎。至於佢嘅好兄弟韋迪，日前喺生日會上就收到汽車代理送出一部價值23萬美元嘅麥拿侖MP4-12C跑車，據悉呢部戰神級跑車定單已排到2015年，所以其他人就算有錢都冇咁快擁有得到o架！