立法會搬咗去添馬艦新大樓後，設備好咗，但一直以來嘅優良傳統就好似留低咗喺舊大樓。話說尋日一開會，會議廳內嘅法定人數不足，要響鐘叫人入場，本來呢個情況偶一為之都無可厚非，但最近問題好似愈來愈嚴重，上周三係咁、上月十四日又係咁，歸根究柢係新大樓太方便之故。
喺中環舊大樓嘅年代，議員辦事處（議辦）並非同會議廳處於同一幢樓，議員為免出現一開會唔夠人嘅尷尬場面，多數都會乖乖地一早到前廳候命。搬到新大樓後，議辦喺會議廳樓上，早到嘅議員多數喺議辦等開工，仲等到夠鐘先至落樓，唔遲到就假喇！
講開又講，立法會行政管理委員會準備喺新大樓向海嘅入口附近劃個位畀議員、議員助理或者秘書處職員泊單車。雖然未有議員踩單車返工，但原來有議員助理同秘書處職員有呢個需要，如果單車位方便人，又鼓勵大家環保同健康，咁都係好嘅。