政情：醫管局爆PY年薪430萬
醫管局行政總裁梁栢賢（PY）話咁快就做咗一年有多，期間處理過屯門醫院連串醫療事故及內地孕婦衝急症室等燙手山芋難題，身負重任，但佢份人工幾錢就從未曝光。根據醫管局上年度年報披露，PY喺一○年十一月上任至去年三月底嘅五個月任期內，人工連同福利達一百七十多萬元，從而推算年薪高達四百三十萬元，稱得上係打工皇帝。
雖然PY嘅年薪計落仍低過前行政總裁蘇利民一成人工，但因為佢由質素及安全總監晉升至行政總裁，連帶人工都三級跳，真係恨死唔少打工仔。不過，公立醫院醫療事故多，行政總裁一職自然係三煞位，所以攞得咁高人工自然要「食得鹹魚抵得渴」。
PY升職加薪，但醫管局有四名打工皇帝嘅薪酬都較去年少，人工排名第三嘅新界東醫院聯網總監馮東笑言︰「自己都唔知被人減薪，其實醫管局都係跟隨公務員加減人工，基本薪酬應該無少到，反而係少咗特別津貼。」