政情：黃成智遇襲又關毓民事?!
民主黨馮煒光上個禮拜去台灣睇總統大選，聲稱喺國民黨總部畀人民力量立法會議員黃毓民襲擊。毓民前日喺記者會上堅稱無打過馮煒光，仲親身向傳媒示範自己根本無可能隔住兩個人打到馮煒光。呢場鬧劇尋日又有新情節，民主黨立法會議員黃成智殺出嚟，話喺旺角畀人踢，唔排除同人民力量有關。人民力量立即回敬話件事亦唔排除民主黨作大。
馮煒光fb發道歉聲明
民主黨中常委馮煒光尋日喺facebook發表道歉聲明，主動澄清早前話毓民因為個仔而唔敢激嬲中共件事其實係無根無據，仲公開向毓民道歉並撤回言論 。不過，佢今日都會按照計劃，去立法會申訴部投訴毓民。
疑似暴力事件一波未平，一波又起。民主黨立法會議員黃成智尋日下晝喺旺角過馬路時畀一個男人喺佢小腿嘅上五寸下五寸部位踢咗一腳，佢跟住就報警同去廣華醫院驗傷，傷口長五公分。黃成智大鑼大鼓開記者會，話今次好明顯係有人存心攻擊，又話唔排除同民主黨成員與人民力量成員發生衝突，繼而引發嘅網上罵戰同虛擬暴力有關。（黃成智有會唔開去咗旺角，因為要幫個仔交電話費！）
對於人民力量有片段證明民主黨中常委甄永樂喺扶手電梯上伸腳踢人民力量嘅義工，黃成智尋日終於承認的確有此事，仲話甄永樂已經親口承認。佢又引述甄永樂嘅解釋，話因為前面嘅人阻住佢拍攝事發經過，所以先會用腳踢人。不過黃成智講明不能接受甄永樂嘅行為。
毓民唔回應事件。人民力量主席劉嘉鴻就話，如果黃成智話唔排除襲擊事件同人民力量有關嘅話，佢哋都唔排除件事係民主黨自己誇大，目的係要冤枉人民力量。劉嘉鴻又話，甄永樂承認踢人，佢應該道歉，又批評民主黨嘅所作所為係暴力文化嘅延續。
有民主黨中人話，就算唔針對毓民今次打人，但毓民喺台灣講粗口已經算係行為不檢，違反咗立法會議事規則。民主黨今個禮拜會喺黨團會議傾罷免毓民嘅可行性。不過，工黨嘅李卓人就唔贊成罷免毓民，話事件唔涉及刑事成分，唔使吓吓就講罷免。