中環出更：李運強遊地中海 無懼沉「輪」
意大利郵輪「協和號」觸礁事件令人震驚，但城中名人似乎唔係好驚，話會繼續坐郵輪歎世界。理文造紙主席李運強同前馬會行政總裁黃至剛都係郵輪常客，仲異口同聲話唔怕再幫襯，事關現今航海技術好安全，加上今次事件多數係人為因素造成，而李運強仲計劃四、五月同太太坐郵輪去地中海一帶暢遊添！
李運強周日同太太現身馬場時話，協和號事件唔會影響佢搭郵輪嘅信心，仲計劃同太太搭郵輪暢遊地中海一帶，享受幾日海上風光。見佢咁有興致出遊，仲揀定四月之後，莫非係想等囝囝李文斌卸任仁濟醫院主席後，有時間陪兩老出埠度假？點知佢笑笑口話，等阿仔卸任係真嘅，但唔係同佢一齊出去玩，而係等佢有時間睇實間公司，咁自己同太太咪可以放心盡享二人世界囉！
黃至剛讚北歐線安全
卓妮尋日下晝亦喺香港會所遇到黃至剛去食晏，傾開先知原來佢有四、五次搭郵輪旅行嘅經驗，暢遊過北歐及南歐，佢盛讚海上旅遊確係好寫意。雖然協和號事件令人嚇破膽，但無損佢搭郵輪旅行嘅興致，事關今次人為因素成分好大，連船員都講多種唔同嘅語言，可見連溝通都成問題喇！佢仲教路，要揀北歐嘅郵輪，因為安全標準及船員質素都會高啲喎。
卓妮