中環出更：青聯俊男美女 蘭桂坊送舊迎新
剛過去嘅聖誕及新年氣氛令人回味，特別係人頭湧湧嘅中環蘭桂坊，去舊迎新氣氛濃厚，原來香港青年聯會一班俊男美女都有去湊熱鬧，日前齊集中環士丹利街嘅酒吧Halo，齊齊舉杯迎接新年。
專程由加拿大返港過節嘅青聯賢慧社前主席彭芷君（Gigi），與當心胸肺外科專家嘅老公辛光耀拍拖到場，大家好久不見，莫不熱情擁抱，場面溫馨。咁熱鬧嘅場合，唔少得賢慧社主席羅詠詩（Anthea）、副主席林玉茵、常董蔡敏思、秘書長費詠詩等靚女，青聯秘書長楊全盛、甄韋喬等亦現身同樂。
賢慧社帶小朋友遊海洋公園
新年伊始，賢慧社嚟緊嘅重頭戲係舉辦「青聯賢慧愛家日」活動，預計會喺四月中旬，將帶過千名來自低收入家庭及少數族裔嘅小朋友，免費暢遊海洋公園一日。Anthea話，呢個活動已經舉辦咗兩年，佢每當見到小朋友嘅開心笑容，就會深受感動，所以今年幾忙都會抽時間再去，仲努力籌款希望有更多小朋友受惠。
當晚青聯前主席許華傑太太戴夢瑩都喺度，佢係青聯附屬機構「香港國學中心」主席，當晚仲帶埋國學中心嘅T恤樣辦嚟畀大家一齊揀，大家同心為社會做好事，零舍開心。
卓妮