政情：CY美食節掃貨 唐唐訪中產家
特首參選人梁振英（CY）尋日一家五口去咗旺角花墟本地漁農美食迎春嘉年華，CY就讚啲有機菜靚過佢屋企業餘種嗰啲多多聲，佢仲即場買菜、買魚又買海味，仲買咗一盆臭草返屋企煲綠豆沙添，使咗差唔多六百元。CY話，雖然本地貨價錢係貴啲，但都幫襯係想為本地漁農業打打氣，絕對物有所值喎，仲話本地漁農界嘅重要性好大，當然贏得好多掌聲啦！
爭取選票 主動出席
CY去美食展前，上午就主動去咗民建聯喺金鐘添馬公園舉行嘅黨慶活動，佢承認沒有獲邀請，只係「路過」現場入去同啲人握吓手喎。CY又話，佢會一票一票去爭取選委嘅票，已經有一定進度，對選情有信心，包括爭取民建聯選委嘅支持。
另一特首參選人唐英年尋日亦同太太去咗柴灣杏花邨做家訪。唐唐話用咗「第一手」角度去聽吓啲「典型中產」嘅心聲後，令佢明白到其實好多中產交稅多，福利又少，負擔仲好大添，所以政府未來一定要審慎理財，佢仲好有心祝記者「心想事成、萬事勝意」，好似搞錯咗係農曆新年咁。