渡海濠情：專業性騷擾 囡囡好輕佻

認清對象

乜性騷擾都有分「專業」咩？貝貝就話一般人唔識嘢，對住陌生人亂咁噏，結果搞到神憎鬼厭，所以抵畀人告喎！貝貝解釋：「嗱，點解同一句說話，一個人講就畀人有口花花感覺，而另一個人講就被認定性騷擾呢？除咗係環境同工作性質因素，主要係由於當事人唔夠專業囉！個人認為，假如想同另一個人講笑，或真係有心挑逗對方，首先應該混熟咗先，雙方有一定關係，了解對方為人至講有味笑話，咁就唔怕對方告你啦！」照阿妹咁講，你一定係專業級性騷擾技師啦！「過獎喇，但我可以話畀大家聽，想氹人落疊除咗睇自己能力外，仲要睇埋對方性格，一啲平日嚴肅正經嘅人最好就咪搞，否則一定令你一身蟻！」但阿妹你見男人就搞，咁我咪應該去告你？

一笑置之

對技師貝貝嚟講，外界一切性騷擾係幽默，佢甚至唔介意男女騷擾佢，佢話可以訓練自己口才同反應喎！貝貝解釋：「我每日都『性騷擾』男人，就算姊妹都唔放過，經驗多咗，自然掌握到技巧，但到目前為止，從來冇人去平機會告我，或者係因為大家都明白係講笑啦！至於我最常講嘅敏感話題，離不開係笑男人某部位、將性交體位攞嚟開玩笑，大家笑完就算，我覺得構成性騷擾應該係不斷重複同一話題，否則大家應該一笑置之。另一方面，畀人騷擾可訓練社交技巧，下次再有同類事件就識得應付，唔通男女一坐低，要講相對論或宇宙大爆炸咁深咩！」阿妹你講得輕鬆，若然用你嘅標準界定性騷擾，男人就發達，女人就受難囉！

貝貝 Profile

三圍：34-24-33

身高：5呎4吋

撰文：祖

攝影：德