政情：朱繼陶親遇一屋多姓
今年區議會選舉爆出多個選區嘅種票醜聞，有巴基斯坦籍人士登記嘅住址竟然出現一屋十幾姓，令人懷疑登記人資料嘅真確性。不過香港鐘錶業總會主席朱繼陶（Joseph）就話，佢以前喺恒生銀行工作時，的確遇過呢啲個案，一啲都唔出奇喎。
曾經喺恒生工作三十八年嘅Joseph話，以前有喺該銀行做保安員嘅巴基斯坦籍人士同佢講，巴籍人士來港打工，搵食艱難，所以通常日間同夜間各做一份工，根本就冇時間返屋企瞓覺，所以成班同鄉夾份租一個單位，輪流上間屋度歇一歇，好似「掛單和尚」住廟咁，呢種情況好普遍，一屋十幾姓係真有其事。
佢仲話，唔少人搬咗屋，都唔記得通知番選舉事務處更改住址，咪搞到一個地址有幾個登記人資料囉，認為唔一定係有心種票嘅。