中環出更：中總開P高層歡聚一堂
中華總商會日前舉行聖誕聯歡晚會，筵開四十幾席，副會長袁武、方文雄（David）、各區聯絡處主任盧文端、余鵬春、李應生（Tommy）等高層歡聚一堂，仲有聖誕老人派禮物，中總合唱團獻唱聖詩，非常熱鬧。
David剛剛喺特首選委商界組別自動當選，下年又要忙特首選舉，聖誕節係時候要抖吓氣，佢會同家人去馬來西亞嘅KK島度假四天，享受一下陽光與海灘。佢話自己已經去過馬來西亞好多次，但係去極都唔厭，因為每次去太凍或者太遠嘅地方，都要執成籮行李，又重又論盡，去馬來西亞就輕鬆得多。
李應生自製養生中藥粉
卓妮見到做中藥業嘅Tommy精神奕奕，烏髮濃密，一啲都唔似做咗兩個孫嘅爺爺，原來佢將人參、田七、冬蟲草磨粉，每朝起身食一小匙，久而久之就會聲如洪鐘，面色紅潤喇。不過佢話，所有補身功效嘅中藥，感冒時都唔好食，以免有反效果。
余鵬春對來年經濟則頗樂觀，佢話歐債危機對經濟嘅影響已減退，消費意欲亦隨住節日臨近而恢復，明年農曆新年來得早，相信會刺激市民持續消費。
同場仲有新界區副主任齊光華，佢自爆下年將會接任新界總商會同港九敬老福利會嘅主席，將會有排忙。從事玩具生產嘅佢，慨嘆內地工廠做唔住就快執笠，年輕一代唔肯入行，成本又不斷上漲，惟有轉型做貿易。卓妮仲見到八十後嘅中總個人會員張瑋傑，原來佢係白手興家嘅「富一代」，年輕有為，為中總增添活力。
卓妮