成日都話香港人命苦，真係一啲都冇講錯。唔係咩？蝸居一族在生之時死慳爛慳都儲唔夠錢買樓，一個唔覺意兩腳一伸魂歸天國，又冇辦法搵一處地方安息，死無葬身之地簡直係香港之恥！
骨灰龕位長期供不應求，輪候公營龕位固然望穿秋水，即使購買私營龕位亦都無法安心，原因係香港嘅私營骨灰龕場唔少係無牌營業，孝子賢孫隨時要面對祖宗十八代被迫遷嘅慘痛局面。
好嘞，骨灰龕位問題困擾咗咁耐，理論上負責其事嘅食物及衞生局到底有乜嘢因應措施呢？講起呢家嘢就心傷咯，急驚風遇着慢郎中已經夠慘啦，家陣係瓜老襯遇着龜官僚，死都死得唔眼閉。食衞局以極慢極慢嘅烏龜速度處理喪葬事宜，局長周一嶽話喎，私營骨灰龕場設立發牌制度嘅第二階段公眾諮詢工作展開嘞，諮詢公眾三個月，建議設立一條新法例，成立發牌委員會規管，私營骨灰龕場必須五年續牌一次。至於現已存在但未符合規定嘅龕場，如果表明態度尋求規範化，可獲暫時免責期，不過免責到幾時，就語焉不詳，只係要求暫停銷售龕位，亦要減低噪音，以免滋擾公眾。
立法會議員當然擔心啦，條例草案要到二○一三年底先至提交立法會，恐怕有不法商人趁機促銷龕位，令消費者蒙受損失，所以要求政府加快立法速度。亦有議員認為，建議給予免責期太過寬鬆，難以取締不合資格嘅骨灰龕場。各界關注骨灰龕法案大聯盟就認為，根本毋須第二輪諮詢，應該立即取締違規骨灰龕場，以及盡快公布龕位嘅供應量以及時間表。
呢嗱嗱嗱，周一嶽親身演繹何謂拖得一時得一時嘅拖字訣。明年六月尾曾蔭權政府都夠鐘執包袱落台啦，周一嶽當然跟大隊拍拍屁股走人，條例草案要到後年先至提交立法會，好明顯係將蘇州屎留畀繼任人。
喂，唔好唔記得，骨灰龕位嚴重短缺並非突發問題，而係日積月累嘅長期現象，周一嶽做咗咁多年局長，一直懶懶閒，臨收工都未做好諮詢工作，絕對係徹底失職。
計功夫茶話齋，香港人平均壽命愈來愈長係有原因o架。試想想，如果閣下唔夠長命，又點等得到骨灰龕位正常供應呢？又點等得到骨灰龕場受到規管呢？孔夫子有云，老而不死是為賊也，不過今時唔同往日，正確講法應該係咁，老而不死是為好市民也。香港人迫於無奈利用自己嘅長命百歲配合政府嘅龜速施政，你話係咪肯捱義氣嘅好市民吖！
規管龕位拖呀拖，港人無奈鬥命長，功夫茶祝各位壽與天齊！