周一鑊尋日補鑊唔係有公立醫院派錯藥或醫死人，而係公布針對早前花園街大火作出嘅排檔管理新措施，為旗下嘅食環署管理排檔失職補鑊；下午又公布拖咗幾年嘅私營骨灰龕場發牌制度。至於久未露面嘅教育局局長孫明揚，就公布虎頭蛇尾嘅分拆教科書同電子課本措施；之後又輪到政制及內地事務局局長譚志源，公布後知後覺、唔鬧唔做嘢嘅打擊種票建議。
到最後壓軸登場嘅係環境局局長邱騰華，公布兩電瘋狂加電費，令小市民生活百上加斤，總之樣樣都唔係好嘢，愈聽就愈火滾。其實夕陽政府過去已多次使出類似陰招，透過一次過公布多項重要政策同消息，蓋過啲衰嘢，但一次過推出五項衰嘢互相遮醜，就前所未有。