政情：劉美詩過完冷河轉新工
康泰旅行社前一姐劉美詩（Susanna）久休復出，本月初効力上市無耐嘅旅行社專業旅運，出任市場及業務發展總經理。Susanna休息咗一年零兩個月先轉新工，已過完康泰要求嘅「冷河期」，趁呢段時間好好休息吓。佢又話，過去並無同前老闆黃士心鬧交，所以日後喺工作場合碰面都唔會覺得尷尬喎，佢仲喺返新工前同前老闆「單聲」添！
Susanna話効力專業旅運並非獵頭公司搵佢，而係佢認識咗好耐嘅專業旅運老闆娘高鄭杏芳邀請佢加盟。專業旅運近年正大展拳腳，現已開設咗五十四間門市分店，下周又有新店開張，睇嚟Susanna又有排忙喇！Susanna依家喺中環返工，但佢話公司總部好快會搬到長沙灣一商廈嘅全層新寫字樓，屆時現有寫字樓都會保留做門市生意。